Афғонистон Ислом Республикаси президенти Ашраф Ғани ва унинг рафиқаси коронавирус учун тест топширди. Натижалар салбий чиқди дея маълум қилди президент вакили Содиқ Сиддиқий.
Ҳозирда президент саройида хизмат қиладиган 40 нафар хизматчида коронавирус қайд этилган. Ўтган ҳафтадан бери Ғани ҳукумат йиғилишларини видеоконференция шаклида ташкил қилган.
«COVID-19 учун тест президент ва биринчи хонимнинг ўз хоҳиш-иродаси билан ўтказилди. Иккала натижа ҳам салбий. Президент соғлом ва ҳукуматнинг ҳаракатларини ҳар жабҳада олиб бормоқда. Унинг иш муҳити хавфсиз ва соғлом бўлишини таъминлаш учун барча чоралар кўрилган», - деб ёзди Сиддиқий ўз твиттерда.
Ҳозирда Афғонистонда 1092 та коронавирус ҳолати тасдиқланди, улардан 36 таси ўлим билан якунланган. 150 нафар бемор бутунлай соғайиб кетган.