“Амирсой” тоғ-чанғи курорти ҳудудида намозхона очилди

“Амирсой” тоғ-чанғи курорти ҳудудида намозхона очилди

Тошкент вилояти Бўстонлиқ туманида “Амирсой” тоғ-чанғи курортида намозхона очилди. Бу ҳақда “Амирсой” тоғ-чанғи курортида Халқаро пресс-клубнинг навбатдаги сайёр сессиясида иштирок этган Sof.uz мухбири хабар қилмоқда.

Республикамизда зиёрат туризмини ривожлантириш, юртдошларимизга қулай шароит яратиш мақсадида курорт ҳудудида қулай ва иссиқ ибодат хонаси ташкил этилди. 

Намозхона курортнинг касса ва тиббий амбулатория хоналари ёнида жойлашган бўлиб, "Prayer room. Комната для молитв" деб ёзиб қўйилган.

"Ҳожатхонада ҳам таҳорат қилиш учун шароитлар яратишибди", дейди Sof.uz мухбири.

“Амирсой” мажмуасини ишга тушириш учун Италия, Германия, Австрия, Аргентина, Испания ва Дания каби давлатлардан етакчи лойиҳачи компаниялар жалб этилиб, тоғ-чанғи курорти мажмуаси замонавий жаҳон стандартлари асосида қуриб битказилди.

“Амирсой” лойиҳаси бўйича 2018 йилдан буён 892 гектар майдонда кенг кўламли қурилиш ишлари олиб борилиб, у 580 ўринга мўлжалланган. Лойиҳа доирасида 300 янги иш ўрни яратилиши кўзда тутилган ҳамда унинг умумий қиймати 100,0 млн. АҚШ долларини ташкил қилади.