Аввал хабар қилганимиздек, 11 февраль куни Андижон вилояти Шаҳрихон туманидаги касалхонада портлаш содир бўлди.
Қирғизистоннинг Ўзбекистондаги элчихонаси Андижон вилояти Шаҳрихон туманида “Зитерия” хусусий даволаш-диагностика марказида газ-ҳаво аралашмасининг портлаши оқибатида Қирғизистон Республикаси фуқароси 1966 йилда туғилган Р.Н. вафот этгани ҳақида маълум қилган.
Маълум қилинишича, Қирғизистон Республикаси фуқаросининг жасади яқин қариндошлари томонидан Қирғизистонга етказилди. Бу масала Қирғизистоннинг Ўзбекистондаги элчихонаси назоратида, дейилади хабарда.
Мазкур ҳолат юзасидан Ўзбекистон Республикаси Жиноят кодексининг 257-моддаси (меҳнатни муҳофаза қилиш қоидаларини бузиш) билан жиноят иши қўзғатилган. Ҳозирда мазкур ҳолат юзасидан дастлабки тергов ҳаракатлари олиб борилмоқда.