Американинг Apple корпорацияси сўнгги ҳафталарда ўз ишлаб чиқаришининг бир қисмини Хитойдан ташқарига ўтказиш режаларини тезлаштирди. Бу ҳақда Wall Street Journal манбаларга таяниб хабар берди.
Манбаларга кўра, Apple етказиб берувчилардан ўз маҳсулотларини бошқа Осиё мамлакатларида, хусусан Ҳиндистон ва Ветнамда йиғишни агрессивроқ режалаштиришни сўрамоқда ва Foxconn Technology Group бошчилигидаги Тайван монтажчиларига бўлган ишончини камайтиришга интилмоқда.
Қайд этилишича, Хитойнинг Чженчжоу шаҳрида 300 минг киши ишлайдиган ва бир вақтнинг ўзида iPhone Pro линиясининг 85 фоизини ташкил қилган йирик iPhone заводларидан бирида ишчиларнинг ноябрдаги тартибсизликлари бу қарорга сабаб бўлган.
Apple айнан қачон ушбу заводга қарамликдан бутунлай қутула олиши ҳозирча аниқ эмас. Ечимлардан бири, агар бу компаниялар Хитойда жойлашган бўлса ҳам, кўпроқ монтажчиларни жалб қилиш бўлиши мумкин. Бундай компаниялар, газетанинг ёзишича, Хитойнинг Luxshare Precision Industry ва Wingtech Technology компанияларидир.
Аввалроқ инсайдерлар Foxconn муаммолари туфайли Хитойда iPhone ишлаб чиқариш камида 30 фоизга қисқариши мумкинлигини айтган эди. Компания ноябрь ойи охиригача ишлаб чиқариш жараёнларини барқарорлаштира олмайди деган хулосага келди. Apple iPhone ишлаб чиқаришдаги муаммолар туфайли 8 миллиард доллар йўқотиши кутилмоқда.