Apple компанияси MacBook Pro ноутбукларининг сенсорли экранли версияларини ишлаб чиқмоқда ва гаджетларни 2025 йилдан олдинроқ чиқаришни режалаштирмоқда. Бу ҳақда Bloomberg хабар бермоқда.

"Apple муҳандислари лойиҳада фаол иштирок этмоқда, бу эса компания ўз тарихида биринчи марта сенсорли экранли Mac компьютерларини чиқариш масаласини жиддий кўриб чиқаётганидан далолат беради", — дейилади агентлик манбалари.

2010 йилда Apple асосчиси Стив Жобс компьютерлардаги бошқарувнинг бундай турини танқид қилган эди. Бизнесменнинг айтишича, Mac'га сенсорли экранларни ўрнатиш "эргономик нуқтаи назардан даҳшатли" қарор бўлади. 2012 йилда Apple бош директори Тим Кук Microsoft компаниясининг планшетлар ва ноутбукларни бир қурилмага бирлаштириш қарорини масхара қилган эди.

Агентлик маълумотларига кўра, Apple'нинг сенсорли экранли ноутбуклари 2025 йилда MacBook Pro’нинг кенгроқ янгиланиши доирасида сотувга чиқарилади. Компания, шунингдек, юқори тасвир контрастини таъминлаш учун суюқ кристалл дисплей технологиясидан ЛEД технологиясига ўтишни режалаштирмоқда.