АҚШ ҳукумати Тель-Авив яқинидаги терактни қоралайди ва воқеа юзасидан Исроилга ёрдам таклиф қилди. Бу ҳақда ўз “Twitter” саҳифасида АҚШ президентининг миллий хавфсизлик масалалари бўйича ёрдамчиси Жейк Салливан ёзди.

– Биз Тель-Авив яқинидаги ҳужумдан ҳайратдамиз ва исроиллик иттифоқчиларимизни қўллаб-қувватлаймиз, – деди Жейк Салливан. Бу 11 кун ичида учинчи шундай ҳуруждир. Биз Исроил бош вазири Нафтали Беннетт ва унинг ҳукуматига барча керакли ёрдамни таклиф қилдик. Сешанба куни Тель-Авив яқинидаги Бней-Брак шаҳрида автомат билан қуролланган 26 ёшли фаластинлик ўт очиб, 5 нафар исроилликни ўлдирган.  

Яҳудий давлати ташқи ишлар вазирлиги маълумотига кўра, бир ҳафта ичида 11 нафар исроиллик теракт қурбони бўлган. Шу муносабат билан Исроил армияси Ғарбий Соҳилга қўшимча ҳарбий қисмларни жўнатмоқда.