АҚШ президенти Доналд Трамп Вашингтон "Очиқ осмон тўғрисида" ги шартномадан чиқаётганини тасдиқлади. Унинг билдиришича, Россия келишув шартларини бажармаяпти. Шу билан бирга Трамп янги шартнома тузилиши мумкинлигини истисно қилмади.

"Менимча, бизнинг Россия билан алоқаларимиз яхши. Лекин Россия келишувни бажармаяпти. Шу сабабли Россия шартларни бажармагунча биз ундан чиқиб турамиз", - дея президент Трамп сўзларидан иқтибос келтирди Reuters агентлиги.

АҚШнинг келишувдан чиқиш тўғрисидаги қарори 6 ойдан кейин кучга киради, дея маълум қилди давлат котиби Майкл Помпео. Унинг сўзларига кўра, Россия нафақат бу, балки қуролли кучлар устидан назорат ўрнатиш тўғрисидаги шартномадаги мажбуриятларини ҳам бажармаган.

Россия Ташқи ишлар вазирлиги Вашингтоннинг баёнотига жавобан Москва келишувни сақлаб қолиш учун барча имкониятларни ишга солаётганини ва музокаралардаги тафовутларни ҳал қилишга умид қилаётганини айтди. “Агар АҚШ ушбу шартномадан чиқса, унда унинг иштирокчилари манфаатларининг жуда нозик мувозанати бузилади. Натижада нафақат "Очиқ осмон тўғрисида" ги Келишув, балки бутун Европа хавфсизлик архитектураси ҳам зарар кўради”, - дейилади Россия ТИВ баёнотида.

"Очиқ осмон тўғрисида" келишув 34 давлат томонидан имзоланган.