АҚШ президенти Доналд Трамп маъмурияти Шинжонда етиштирилган хитой пахта маҳсулотларига тақиқ қўйишни муҳокама қилмоқда. Бу ҳақда The New York Times газетаси манбаларига таяниб хабар бермоқда. Тақиқлар сабаби сифатида асосан уйғурлар яшайдиган Шинжонда инсон ҳуқуқлари бузилаётгани келтирилган. 

Тақиқ кенг турдаги кийим-кечак ва бошқа пахта маҳсулотларига тааллуқли бўлиши мумкин. Бу Хитойдан олинадиган пахта маҳсулотларининг қайси ҳажмига таъсир қилиши ва Шинжон пахтасидан ишлаб чиқарилган ва учинчи мамлакатлардан олиб кириладиган товарлар санкцияларга тушиб қоладими ёки йўқми, ҳали аниқ эмас.

Мумкин бўлган чекловлар Шинжонда мажбурий меҳнатга оид кенг тарқалган хавотирлардан келиб чиқди, бу ерда мусулмон озчиликларга мунтазам равишда зулм қилинмоқда.

Хитой йилига қарийб 5,8 миллион тонна пахта ишлаб чиқаради ва 2 миллион тоннани импорт қилади, Хитой импортининг тўртдан бир қисмигача АҚШ етказиб беради.

Хитойдан пахта импортини тўхтатиш учун ҳар қандай ҳаракат глобал тўқимачилик бозори учун катта таъсир кўрсатиши мумкин, деди NYT. Шинжон ушбу хомашёни Хитой фабрикаларига асосий етказиб берувчидир. Кўпгина йирик глобал кийим маркалари ишлаб чиқаришда Шинжон пахтасидан фойдаланадилар. Ушбу тақиқ Хитойдан Ветнам, Бангладеш, Индонезияга пахта олиб борадиган йирик кийим-кечак ишлаб чиқарувчиларининг ваҳима қилишларига сабаб бўлиши мумкин.

Импорт тақиқланиши Трамп учун янги қадам бўлади, у сайловлар арафасида Хитойга қарши қаттиқ позицияни эгаллади, деб ёзади NYT. Президент Пекинни коронавируснинг бутун дунёга тарқалишига йўл қўйганликда айбламоқда. Трамп маъмурияти сўнгги ойларда Хитойга босимни кучайтирмоқда, ўнлаб компаниялар ва жисмоний шахсларга қарши санкцияларни қўлламоқда.

Июл ойида Вашингтон Хитойдан бир нечта тўқимачилик фабрикаларини мажбурий меҳнатдан фойдаланганлиги сабабли қора рўйхатга киритди. Ушбу рўйхатга Ralf Lauren, Tommy Hilfiger ва Hugo Boss каби йирик халқаро брендларнинг амалдаги ёки собиқ етказиб берувчилари киради.