Октябрь ойида АҚШда истеъмол нархларининг ўсиши йиллик кўрсаткичда 7,7 фоизга тушди, бу экспертлар кутганидан паст бўлди ва жорий йилнинг январь ойидан бошлаб минимал даражага айланди. Бу ҳақда мамлакат меҳнат вазирлиги матбуот-релизига таяниб, "ТАСС" хабар бермоқда.

Сентябрь ойида йиллик инфляция 8,2 фоизни ташкил этган бўлса, экспертлар октябрь ойидаги натижа 7,9-8 фоиз минтақада бўлишини тахмин қилишган.

Ойлик асосда АҚШ нархлари октябрь ойида сентябрь ойидаги каби 0,4 фоизга ошди. Бироқ, бу кўрсаткич 0,6 фоиз даражасига етиши кутилган эди.

Аввалроқ Туркияда инфляция октябрь ойида 85,51 фоизга етгани хабар қилинганди. Россияда 7 ноябрь ҳолатига кўра инфляция 12,52 фоизгача пасайди. Иқтисодий ривожланиш вазирлиги раҳбари Максим Решетниковнинг сўзларига кўра, йил охирида нархларнинг ўсиши 12-12,4 фоиз оралиғида тўхтайди.

Айни пайтда Россия президенти Владимир Путин шу ҳафта Россияда инфляция келаси йил бошида 5 фоизгача тушиши мумкинлигини айтди. У индикаторнинг пасайиш тенденцияси барқарор бўлганига ишонч билдирди.