АҚШнинг Небраска штатида электрон сигарета чекишдан 65 ёшли эркак вафот этди. “У мамлакатда вейпнинг (электрон сигарета) 15-қурбони бўлди”, деб хабар бермоқда NBC News.

Аслида бу эркак шу йил май ойида ўлган. Аммо эпидемиологик Том Сафранекка кўра, шифокорлар унинг ўлим сабабини энди – вейп туфайли келиб чиққани айтилаётган ўлим ва соғлиқ оғирлашиши ҳолатлари оммавий равишда кўпайган бир вазиятда аниқладилар. Ҳаммаси бўлиб АҚШда шу кунгача электрон сигарета чеккани натижасида нафас олиш тизимидан шикоят қилган 800 дан ортиқ киши рўйхатга олинган.

Август ойи охирида электрон сигарета сабабли Иллинойсда яшовчи бир эркак вафот этган. Сан-Франциско, Мичиган ва Калифорнияда аллақачон хушбўй ҳидли аралашма қўшиб чекиладиган вейплар тақиқланган, АҚШ президенти Доналд Трамп эса унинг савдосини бутун мамлакатда тақиқлаш ҳақида айтган эди. Аммо бу қачон амалга ошиши маълум қилинмаган.