Денгиз орқали етказиб бериладиган Россия нефть маҳсулотларига нархларнинг юқори чегараси сиёсатида иштирок этувчи давлатлар коалицияси вакиллари уларнинг тоифасига қараб иккита алоҳида нарх чегарасини белгилашга келишиб олдилар. Бу ҳақда G7 мамлакатлари ва Австралиянинг АҚШ молия вазирлиги тарқатган қўшма баёнотида айтилади, деб ёзади "ТАСС".

Эълонга кўра, бир баррель учун 100 долларлик биринчи нарх даражаси хом нефтдан юқори нархда сотиладиган нефть маҳсулотларига нисбатан қўлланилади. Буларга дизель ва бензин киради. Бир баррель учун 45 АҚШ доллари миқдоридаги иккинчи чегара хом нефтга чегирма билан сотиладиган нефть маҳсулотлари учун белгиланган.

Баёнотда аниқлик киритилишича, нефть маҳсулотлари учун нарх чегараси G7 мамлакатлари ва Австралия юрисдикцияларида 2023 йил 5 февралдан бошлаб ёки "шу санадан кўп ўтмай" кучга киради.

Таъкидланишича, бу чегара 5 февралгача кемаларга юкланган маҳсулотлар учун истиснони назарда тутади.

30 январь куни Россия Федерацияси ҳукумати Россия президенти Владимир Путиннинг Россия нефтини шартномалар бўйича етказиб беришни тақиқлаш тўғрисидаги фармонини амалга ошириш бўйича тушунтиришларни эълон қилди, бу унга нисбатан нархларнинг юқори чегарасига риоя қилишни назарда тутади. 

Қарорга мувофиқ, Россия энергетика ва молия вазирликлари 1 мартгача экспорт қилинадиган нефть нархларини мониторинг қилиш тартибини белгилаши керак. Шу билан бирга, экспорт қилувчи корхоналар ҳар ой Энергетика вазирлигига шартномалар ва нархлар тўғрисидаги маълумотларни, шунингдек, якуний харидорга нархларни белгилаш механизмидан фойдаланмаслик мониторинги тўғрисидаги маълумотларни тақдим этишлари шарт.