Bank of America таҳлилчилари 2023 йилда глобал ялпи ички маҳсулот ўсиши прогнозини декабрь ойида кутилган 2,2 фоиздан 2,5 фоизгача яхшилади. Бу ҳақда ташкилот сайтидаги жаҳон иқтисодиёти департаменти раҳбари Итан Харрис муаллифлик қилган материалда айтилади.
"Турғунлик хавфи ҳақида гап-сўзларга қарамай, жаҳон иқтисодиёти пасайишни истамаяпти. Энди биз еврозона рецессиядан қочади ва АҚШдаги рецессия кечиктирилади, деб ўйлаймиз", — деди банк. Шу билан бирга, келгуси икки йил ичида жаҳон иқтисодиёти ҳали ҳам заиф ўсишни кутмоқда ва 2024 йилда у фақат 3 фоизни ташкил қилади.
Таҳлилчилар прогнознинг ўзгариши сабаблари сифатида таъминот занжирларининг барқарорлашувини, марказий банклар томонидан ставкаларни оширишга нисбатан юмшоқ бозор реакциясини мисол тариқасида келтиришди. Ушбу омиллар хизматлар бозорининг ривожланиши билан биргаликда инфляциянинг кейинги ўсишини тўхтатишга ёрдам берди ва блокировкалар тугаганидан кейин Хитой иқтисодиётининг тикланиши товарларга талабни қўллаб-қувватлади.
Таҳлилчилар, шунингдек, энергия нархининг кескин ўсиши биринчи навбатда Европа учун оғриқли бўлганини таъкидламоқда. Бироқ, минтақа давлатлари солиқ имтиёзлари ва субсидиялар, энергияни самарали тежаш ва иситиш мавсумида ғайритабиий иссиқ об-ҳаво туфайли таназзулдан қутулишга муваффақ бўлди.
"Биз Европадаги инқирознинг охири йўқлигини кўряпмиз, бироқ глобал иқтисодиётга бошқа зарба ҳам кўрмаяпмиз. Бу дунё бирданига хавфсиз жойга айланди, дегани эмас, чунки сиёсий, геосиёсий ва бошқа хавф-хатарлар кўп. Лекин ҳозирча ҳаммаси яхши", — дея хулоса қилди банк.