Фаолиятини профессионал боксда давом эттираётган ўзбекистонлик спортчи Бектемир Мелиқўзиев GoldenBoy Boxing ҳамда World of Boxing промоутерлик компаниялари билан шартнома имзолади. Бу ҳақда спортчи Twitter'даги саҳифасида маълум қилди.

Хабарда Бектемир ўзининг спортчилик фаолиятидаги тарихига ҳам тўхталиб ўтган. “Мен каратедаги ёш, нўноқ болакай, кўчаларда муштлашиб юришдан Осиё ва жаҳон чемпиони ҳамда Олимпиаданинг кумуш медалигача бўлган йўлни босиб ўтдим. Раҳмат”, - дея твит қолдирган спортчи.

Ўз навбатида GBP раҳбари Де Ла Хоя ҳам келишувдан мамнун эканлигини яширмади: “Бу йигит – ҳақиқий жангчи. У жуда кучли, унинг қўл ва оёқлари ниҳоятда тезкор, айниқса ўз вазн тоифасида. Биз уни тезда рейтингнинг юқори поғоналарига кўтарамиз”.

Бектемир Мелиқўзиев профессионал рингда 3 маротаба курашган ва уччаласида ҳам ғалаба қозонган.