Беларусга расмий ташриф билан борган АҚШ давлат котиби Майкл Помпео: “АҚШ Беларусга давлат мустақиллигини тиклашга ёрдам бермоқчи. Энергия ишлаб чиқарувчиларимиз сизни юз фоиз бозор нархларида нефт билан таъминлашга қодир. Биз дунёдаги энг катта энергия ишлаб чиқарувчимиз. Шундай экан керакли ҳамма нарсани сўрайверинг”, — деди, дея иқтибос келтиради Беларуснинг Белта нашри.
Помпеонинг сўзларига кўра, бу Беларусга АҚШ ёки Россиядан бирини танлаш кераклигини англатмайди.
2020 йилнинг 1 январидан бошлаб Россия ва Беларус ўртасида Европага нефт транзити борасидаги шартнома ўз кучини йўқотди. Томонлар янги шартнома борасида келишувга эриша олишмади. Расмий Минск Россия етказиб бераётган нефтининг қимматлигини рўкач қилмоқда.
Беларус президенти Лукашенко Беларус нефтни қайта ишлаш заводлари учун муқобил нефт етказиб берувчиларни изламоқда. Ой охирига келиб, Норвегиядан синов танкери нефтни Нафтана нефтни қайта ишлаш заводига етказиб берган эди. Президентнинг сўзларига кўра, Россия нефти мамлакат энергия манбаларининг учдан бир қисмини ташкил қилиши керак.
1 февралдан бошлаб Минск Россия нефти транзити учун янги тарифларни эълон қилди – улар 6,6 фоизга ўсган.
Белорус президенти бир йилдан кўпроқ вақт давомида Россиядан энергия манбаларини диверсификация қилиш ва энергия мустақиллиги зарурлиги ҳақида гапириб келади. Ҳозирда Россия нефт ва гази мамлакат энергия балансининг 85 %ини ташкил қилади.
Айнан ҳозир Европада Американинг WTI нефти етказиб бериш учун қулай шароит юзага келди — Ўртаер денгизи ҳавзасида унинг бир баррели Озарбайжон ёки Нигерия нефтидан $2 - $3 арзонроқ.
Шу билан бир қаторда Яқин Шарқдаги вазият туфайли дунёдаги нефт таннархи энг арзон бўлган мамлакатлар Саудия Арабистони, Қатардан нефт етказиб беришнинг мураккаблиги ҳам америкаликлар фойдасига хизмат қилади.
Бироқ Беларус нефтни қайта ишлаш заводлари Россиянинг Urals нефтини қайта ишлашга мўлжалланган. Унинг энг яқин муқобили Норвегия нефти ҳисобланади.
Мавзуга доир: Коронавирус васвасаси: бу январ нефт учун сўнгги 30 йилдаги энг ёмон ой бўлди