Ўзбекистоннинг Белоруссиядаги элчиси Носиржон Юсупов ушбу мамлакат юртимиздан ишчи кучини жалб қилишдан манфаатдор эканини айтиб ўтган. Бу ҳақда БелаПАН нашрига таяниб, eadaily хабар бермоқда.

“Белоруссия тадбиркорлар Ўзбекистондан ишчи кучларини жалб қилишга қизиқишмоқда. Биз қурилиш ташкилотлари раҳбарлари билан учрашганимизда бу ҳақда гаплашган эдик,”- дейди элчи жаноблари.

Дипломатнинг айтишича белоруссияликлар ўзбекистонлик мигрантларга “яхши маиший шароитлар, ётоқхона, шартнома ва тиббий суғурта каби” таклифларни беришган. Юсуповнинг сўзларига кўра, агар Ўзбекистон Евросиё иқтисодий иттифоқига қўшиладиган бўлса, меҳнат мигрантлар муаммосини ҳал қилиши мумкин экан.

Шунингдек, элчи бугунги кунда Белоруссия олий ўқув юртларида мингдан ортиқ ўзбекистонлик талабалар ўқишини эслатиб ўтди.

Икки давлат ўртасида “ўлик” муносабатлар 2018 йил сентябр ойида Александр Лукашенконинг Тошкентга расмий ташрифидан сўнг жонлана бошлаган.