Британия Европа Иттифоқидан чиқиш туфайли $170 млрд йўқотди, йил охирига келиб яна $90 млрд зарар кўриши кутиляпти, деб ёзмоқда Bloomberg.

Брекзитдан кўриладиган умумий зарар 200 млрд фунд стерлинг ёки $261 млрд бўлади, дейди Bloomberg Economics’нинг британиялик таҳлилчиси Ден Хенсон.

Деннинг сўзларига кўра, мамлакатнинг ЕИдан чиқиши ва унинг оқибатлари атрофидаги ноаниқлик бизнес ва истеъмолчиларга таъсир этишда давом этмоқда.

Bloomberg таҳлили шуни кўрсатадики, мамлакат йиллик иқтисодий ўсиши 2%дан 1%га пасаяди ва Буюк Британия G7 (катта еттилик)нинг қолган мамлакатларидан сезиларли даражада орқада қолишни бошлайди. Агар Брекзит бўлмаса, иқтисодиёт камида 3%га ўсади ва Европанинг бошқа мамлакатлари билан бир хил ўсиш суратида ривожланишни давом эттиради.

Брекзит ҳақидаги гап-сўзлар туфайли Британия 2019 йилда энг кўп зарар кўрди — 63 млрд фунд ($82 млрд). Брекзитдан кейин ҳам мамлакат тезда ўзини ўнглолмайди: Хенсоннинг фикрича, “Британия Европа Иттифоқи билан янги савдо алоқаларига мослаша бошлайди, бу эса Брекзит йиллик харажатларининг янада ортишига олиб келади”.

Декабрда бўлиб ўтган сайловларда Брекзит тарафдори бўлган Борис Жонсоннинг партияси ютиб чиққан эди. Бу эса амалда Британия Иттифоқдан чиқишини аниқ қилиб қўйган эди.