Bluestone инвестиция банки Ўзбекистон қимматли қоғозлар бозорида профессионал фаолиятни амалга ошириш учун лицензиялар олди, деб хабар беради Капитал бозорини ривожлантириш агентлиги.

Агентлик Американинг Bluestone Financial Group Inc. молиявий компаниясига инвестиция воситачиси, инвестиция бўйича маслаҳатчи ва инвестиция активлари бўйича ишончли шахснинг хизматларини кўрсатиш ҳуқуқини берадиган лицензияларни тақдим этди. Ушбу лицензиялар Bluestone'ни Ўзбекистондаги тўлиқ бошқариладиган инвестиция банкига айлантиради.

Банк савдо, қарз капитали бозори, қимматли қоғозлар бозори, қўшилиш ва сотиб олиш, хусусийлаштириш, қайта тузиш ва капитализация операцияларига ихтисослашган. 

Асосий тармоқлари истеъмолчилар, нефт ва газ, саноат, металлургия, молиявий институтлар, телекоммуникация, қайта тикланадиган энергия, инфратузилма ва транспортдир.

Банкнинг Нью-Йорк ва Тошкентда ваколатхоналари мавжуд. Компаниянинг таъкидлашича, Ўзбекистон сўнгги йилларда мамлакат иқтисодиётининг фаол ривожланиши, шу қаторда давлат корхоналарини хусусийлаштириш тенденцияси ва хорижий инвестицияларга очиқлиги туфайли танланди.