Қирғизистон бош вазири Муҳаммадкалий Абулғозиев Боткен вилоятидаги Тожикистон билан чегарадаги икки давлат ҳарбийлари ўртасида қуролли зиддият юз берган жойга борди. Бу ҳақда республика ҳукумати сайти хабар бермоқда.
Маълум бўлишича, у бу ерга ишчи сафари доирасида келган.
Мавжуд хабарларга кўра, Абулғозиев чегара ҳудудидаги аҳоли билан учрашув ўтказган, касалхонага бориб воқеадан жабрланганларни зиёрат қилган.
Бундан ташқари, ҳукумат раҳбари чегарадаги вазият бўйича тезкор мажлис ҳам ўтказади.
Аввалроқ Қирғизистон ва Тожикистон чегарачилари ўртасида юз берган отишма натижасида саккиз киши жабрлангани ҳақида хабар берилган эди.