Немисларнинг 57 фоизи мамлакатдаги инфляция даражасини таҳдидлар орасида биринчи ўринга қўйган. Бу ҳақда McKinsey компанияси сўровномасини эълон қилган DPA агентлиги маълум қилди.

Қайд этилишича, сўровномада минг киши иштирок этган.

Агентлик маълумотларига кўра, сўровда қатнашган немисларнинг 18 фоизи Украинадаги можарони, сўровда қатнашганларнинг 6 фоизи иқлим ўзгаришини, 3 фоизи COVID-19 пандемиясини асосий таҳдид деб атаган.

Шу билан бирга, респондентларнинг 60 фоизи уйда электр энергиясини тежашга мажбур бўлганликларини тан олишди, респондентларнинг 16 фоизи таътилни бекор қилишлари кераклигини айтди.

Шунингдек, немисларнинг ярмидан кўпи - 53 фоизи - Рождество учун камроқ харид қилишни режалаштирмоқда, Германия аҳолисининг 12 фоизи совғалардан бутунлай воз кечишни режалаштирмоқда.

Расмий дастлабки маълумотларга кўра, Германияда октябрь ойида инфляция тезлашиб, 10,4 фоизга етди. Аввало, энергия нархининг ошиши ҳисобига кўрсаткич ўсиб бормоқда.