Сешанба куни савдо пайтида мис нархи сўнгги ўн етти ой ичида энг паст даражага тушди - бир тонна учун 8000 доллардан паст.

Бозор иштирокчиларига иқтисодий таназзулнинг ортиб бораётган хатарлари салбий таъсир кўрсатмоқда, бу эса товарларга талабнинг пасайишига олиб келиши мумкин. Citic Futures Co. таҳлилчиларининг таъкидлашича, нархлар ўрта ва узоқ муддатли истиқболда пасайишда давом этиши мумкин, аммо яқин келажакда техник тузатиш эҳтимоли мавжуд.

Анъанага кўра, экспертлар мис нархининг ўзгариши жаҳон иқтисодиётининг яқин келажакдаги йўналишини кўрсатади, деб ҳисоблашади. Кўпгина саноат тармоқларида қўлланиладиган металл нархининг пасайиши иқтисодий вазиятнинг ёмонлашиши эҳтимоли юқори эканлигини кўрсатади.

Лондон металл биржасида (LME) сешанба кунги аукционда етказиб бериш санаси яқинроқ бўлган мисга котировкалар 1,6 фоизга пасайиб, бир тонна учун 7841 долларни ташкил қилди, бу 2021 йил февралидан бери энг паст кўрсаткичдир.