Ижтимоий тармоқларда қўлида болта кўтарган аёл уйини бузилишлардан ҳимоя қилаётгани акс этган видео хабар тарқалди. Аёлнинг сўзларига кўра, унинг уйи иккинчи марта “снос”га тушган.

Унинг уйи биринчи марта бузилганда у болалари билан кўчада қолган. Ҳозир турган уйини эса текинга олмаган, балки кимошди савдосида сотиб олган.

Ўзи нима бўлди

Ижтимоий тармоқларда тарқалган хабарга кўра, воқеа Сурхондарё вилояти Сариосиё тумани Гулобод маҳалласида содир бўлган.

Эгнига президент Мирзиёевнинг портретини осиб олган аёлнинг қўлида болтаси ҳам бор. Видеода кўринишича, аёлнинг ёнида иккита ёш бола ҳам бор.

“Иккита болам билан кўчага қолиб кетдим, [мени] тепиб ҳайдаб чиқаришди. Мен жойимни энди бермайман. Болталайман, бензин қуйиб юбораман. Қўрқадиган жойим йўқ. Меҳнат қилганман”, — дейди аёл.

“У иссиқ уйида бола-чақаси билан ўтирибди, нима учун мен уйимни ташлаб чиқишим керак”, — дейди аёл ҳоким ҳақида.

Воқеа иштирокчиларидан бири аёлга туман ҳокимятига бориб мурожаат қилишни маслаҳат беради.

“Менга ҳокимларинг ҳақида гапирманг. Аввалги уйимни сотиб юборди. У иссиқ уйида бола-чақаси билан ўтирибди, нима учун мен уйимни ташлаб чиқишим керак? Мен бу уйни текинга олмаганман, аукционда сотиб олганман”, — деб гапини давом эттиради аёл.

Аёл буларнинг барчаси вилоят ҳокими буйруғи билан бажарилаётганини таъкидлайди.

“…Мана туман прокурорининг мовини кечирим сўраяпти ва айтяптики, бу ишлар ҳокимнинг буйруғи билан амалга ошяпти. Мана Шавкат Миромонович. Президентдан бошқа ҳеч кимга ишонмайман”, — дейди аёл.

Мавзуга доир: Депутат: Зўравон масъуллар, халқни қийнаб медал олгандан кўра адолат қилинг!