«Энг катта унвон – халқ ишончи!» - Президент унвон ҳақидаги таклифни қабул қилмади

20 январь куни Ўзбекистон Республикаси Олий Мажлиси Қонунчилик палатасининг биринчи мажлиси бўлиб ўтди. Унда президент Шавкат Мирзиёев ҳам иштирок этди.

Мажлисда муҳокама қилинган масалалар юзасидан депутатлар сўзга чиқишди. 

84-Тўйтепа сайлов округидан сайланган депутат Виктор Пак ўзбек тилида фикрларини ифодалаб, сўнгги уч йилда бутун мамлакатда улкан ўзгаришлар амалга оширилгани, шиддат билан ривожланаётгани, энг узоқ қишлоқларгача янги ҳаёт кириб бораётганини таъкидлади. 

"Сайловчиларим менга айтяпти. Президентга раҳматимизни етказинг. Агар сиз депутат бўлсангиз, парламент аъзолари билан гаплашинг. Президентимизга унвон берилсин, дейишди. Ҳурматли депутатлар, нима дейсизлар?", деди Виктор Пак. Барча депутатлар қарсаклар билан бу таклифни қўллаб-қувватлашди.

"Ҳақиқатан, давлатимиз уч йил аввалгидан умуман бошқа давлат, бошқа халқ, бошқа депутатлар. Шавкат Миромонович, сиз давлатимизни 180 градусга янгилик киритдингиз. Ҳозир гапирайми-гапирмайми, деб қўрқиб ўтиргандим. Сиз чиқ дедингиз, чиқдим. Агар нотўғри гапирган бўлсам кечирасизлар. Раҳмат", деди депутат. 

Шавкат Мирзиёев эътироф учун миннатдорлик билдириб, шундай деди:
"Сиз нозик масала - унвон тўғрисида гапирдингиз. Халқимиз менга энг катта унвонни бериб бўлган. Бундан катта унвон дунёда ҳеч кимда бўлмаса керак. Бу – халқ ишончи!"

Депутатлар Президентнинг бу сўзларини ўринларидан туриб, қарсаклар билан қарши олдилар.