Зимбабвьедаги ҳуқуқ ҳимоячилари мамлакатнинг ҳукмрон партияси президент Роберт Мугабенинг 92 ёшини нишонлаш учун қишлоқ аҳолисидан мажбурий равишда пул йиғилаётганини иддао қилмоқда. 

Cotrad ҳуқуқни ҳимоя қилиш гуруҳининг маълум қилишича, Zanu-PF партиясининг ёшлардан иборат фаоллари ҳар бир оиладан бир, давлат хизматчиларидан эса уч доллардан пул йиғмоқда. Партиянинг мақсади беш минг нафарга яқин қатнашчи иштирокида стадионда ўтказиладиган дабдабали байрамни ташкил этишдан иборат.

“Туғилган кунда қиммат зиёфат ўтказиш учун пул етишмайди, партия амалдорлари эса пул йиғишнинг "варварча" усулларидан фойдаланишмоқда”, - дейилади хабарда.

Ўз навбатида, партиянинг ёшлар лигаси котиби Пупурай Тогарепи Zanu-PF қишлоқ аҳолисининг қанчалик қийинчиликда яшаётганини кўриб тургани, бундай усуллардан фойдаланмаслигини айтиб ўтган. Унинг сўзларига кўра, пул бор-йўқлигидан қатъи назар, партия президентнинг туғилган кунини нишонлайди.

Айни пайтда Роберт Мугабе жаҳондаги энг кекса давлат бошқарувчиси саналади. Ёши ўтиб қолганига қарамасдан, сиёсатдан кетиш ҳақида ўйлаётгани йўқ. Жумладан, 2015 йилнинг декабрь ойида у ҳукмрон Zanu-PF партиясининг раҳбарлигига қайта сайланди. Шу йўл билан у 94 ёшини нишонлайдиган 2018 йилги президентлик сайловларида қайтадан иштирок этишни мўлжаллаган.