TopUniversities порталида QS Graduate Employability (Битирувчиларнинг ишга жойлашиши) рейтинги эълон қилинди. Унда битирувчилари яхши ишларга жойлашиши бўйича дунёнинг энг яхши 500 та университети ўрин олган.

Бу йилги рейтингни АҚШнинг Массачусетс технологиялар университети бошқариб турибди. "Сеҳрли диёр"нинг Стенфорд ва Калифорния университетлари кучли учликни ҳеч кимга бермаяпти.

4-ўрин Автралиянинг Сидней университетига насиб қилган бўлса, 5-ўринга яна бир АҚШ вакили — Гарвард университети лойиқ кўрилган.

Евросиёнинг энг яхши олий ўқув юрти сифатида Хитойнинг Цинхуа университети тан олинди (6-ўрин). У ҳатто Англиянинг Кембриж (8-ўрин) ва Оксфорд (10-ўрин) университетларидан ошиб кетди.

Рейтингга Россиядан 13 та ОТМ киритилган. Улар орасида энг машҳурлари: Ломоносов номидаги Москва давлат университети (101-ўрин), Санкт-Петербург давлат университети (181-ўрин), Москва халқаро алоқалар давлат институти (191-ўрин).

Рейтингга Марказий Осиёдан фақатгина бир университет киритилган: ал-Форобий номидаги Қозоғистон миллий университети (251-ўрин).

Афсуски, Ўзбекистон университетларидан биронтаси ҳам бу рўйхатга кира олмади.