Дунёдаги энг йирик криптовалюта биржаларидан бири Kraken оммавий ишдан бўшатишни амалга оширади ва ходимларнинг 30 фоизини ишдан бўшатади. Бу ҳақда унинг ҳаммуассиси ва бош директори Жесси Пауэлл корпоратив блогида маълум қилди.

Унинг аниқлик киритишича, бу компания ўзгарувчан бозор шароитларига мослаша олиши учун зарур. Ишдан бўшатилган ходимларга, тахминан 1100 нафарига 16 ҳафталик иш учун товон пули ваъда қилинган. "Сўнгги бир неча йил ичида крипто маконига юз миллионлаб янги фойдаланувчилар киришди ва шу вақт ичида миллионлаб янги мижозлар Kraken'га ишонч билдиришди. Мижозларга улар биздан кутаётган сифат ва хизматни тақдим этиш учун ходимларимиз сонини уч баробардан кўпроқ оширишимиз керак эди", - деди Пауэлл. Унинг қўшимча қилишича, энди жамоанинг катталиги бир йил олдинги ҳолатга қайтади.

Октябрь ойи охирида Kraken россияликларга чекловлар қўйиб, уларни платформага киришдан маҳрум қилди. Бундан ташқари, руслар биржада янги ҳисоблар ярата олмайди. Фойдаланувчилар сўровига кўра Kraken ҳисобларидан маблағларни ечиб олишлари мумкин, деди компания.

Kraken биринчи крипто биржаларидан бири бўлиб, у 2011 йилда ташкил этилган. Платформа савдо ҳажми бўйича дунёда учинчи ўринни эгаллайди.