Теҳрон АҚШ президенти Дональд Трампнинг ўз мамлакати Эрон ядровий дастури бўйича кўптомонлама шартномадан чиқишига оид қарорини “тарихий хато” деб атади. Бу ҳақда Reuters хабар бермоқда.
Эрон президенти Ҳасан Руҳоний АҚШ мазкур шартноманинг ягона иштирокчиси эмаслиги, шунинг учун эронликлар келишувнинг бошқа иштирокчилари муносабатини кутишга қарор қилганларини билдирди.
8 май кунги телемурожаатида Ҳасан Руҳоний Эрон кўптомонлама ядровий келишув бўйича ўз мажбуриятларига содиқ қолаётганини урғулади. Унга кўра, агар шартноманинг бошқа иштирокчилари ҳамкорликда қўйилган мақсадларга эришилса, Теҳрон 2015 йилда имзоланган шартномадан чиқмайди.
Исроил бош вазири Нетаняху АҚШ президенти “тарихий одим” отганини билдириб, Қўшма Штатларга миннатдорчилик изҳор этди.
Франция президенти Эммануэль Макрон Франция, Германия ва Буюк Британия Вашингтон қароридан таассуфда эканини билдирди.
Россия Ташқи ишлар вазирлиги баёнотида Москванинг Трапм қароридан ҳафсаласи пир бўлгани айтилган.