Facebook ўзининг электрон тўлов тизимини ишга туширди. Унинг ёрдамида Facebook , Messenger, Whatsapp ҳамда Instagramʼга тўлов қилиш мумкин. Бу ҳақда компания расмий блогида хабар қилинмоқда.
Facebook Pay номини олган тўлов тизими бу ҳафтада фақатгина АҚШнинг ўзида ишлайди. Янги хизмат “мавжуд молиявий инфратузилмалар ва ҳамкорлар” базасида ишлайди ва Либра криптовалютасига алоқадор эмас.
“Аллақачон одамлар харидларни амалга ошириш, эҳсон қилиш ёки бир-бирига пул ўтказиш учун иловалардан фойдаланмоқдалар. Facebook Pay ушбу транзаксияларни соддалаштиради”, - дейилади компания хабарида.
Facebook Pay билан бир қаторда компания янги тўлов хизмати орқали харидлар учун пул тўлаганларни қўллаб-қувватлаш учун алоҳида чат очади. Янги тўлов тизимига бир қанча дебет ва кредит карталарини киритиш мумкин. Тизим PayPal билан интеграциялашган.