Фарғона шаҳридаги уйларнинг бирида 14 январь куни уч киши ис газидан заҳарланиб, вафот этгани, улардан бири хонадон меҳмони бўлгани маълум қилинганди. Бош прокурор матбуот котиби Ҳаёт Шамсутдинов ҳолат бўйича қўшимча маълумот берди.
Қайд этилишича, 14 январь куни соат 13:00 ларда шаҳарнинг «Истиқлол» маҳалласида яшовчи икки киши ҳамда шу хонадонга меҳмонга келган бир нафар фуқаро Республика шошилинч тиббий тез ёрдам илмий маркази Фарғона филиалига олиб борилган. Тез тиббий ёрдам кўрсатилганига қарамасдан, улар шифохонада вафот этган.
Вафот этганларнинг икки нафари ҳарбий хизматчи экани аниқланган.
Ҳозирда ҳолат юзасидан Фарғона ҳарбий прокуратураси томонидан терговга қадар текширув ҳаракатлари ўтказилмоқда.