Франция коронавирус эпидемияси устидан ғалаба қозонди – Макрон

Франция коронавирус эпидемияси устидан ғалаба қозонди – Макрон

Фото: Reuters

14 июнь, якшанба куни Франция президенти Эммануел Макрон ватандошларига мурожаат қилиб, коронавирус эпидемияси мағлуб бўлганини маълум қилди.

Бугундан бошлаб Европанинг ички чегаралари очилади, 1 июлдан эса Шенген ҳудуди ташқарисидаги "эпидемия тўхтатилган" мамлакатлар билан алоқалар тикланади.

Франциянинг иккита денгиз орти ҳудуди - Майотта ва Гвианадан ташқари барча ҳудудлари "яшил зона" га киради. Бугундан кафе, бар, ресторанлар ишлай бошлайди, 22 июндан бошлаб барча ўқувчилар мактабга борадилар.

Эпидемия даврида Францияда 194 мингта зарарланиш ҳолатлари қайд этилди, 29 минг бемор инфекциядан вафот этди. Охирги суткада 526 та янги зарарланиш ҳолати аниқланди, 10 кишидан камроқ бемор вафот этди.

Президентнинг сўзларига кўра, ҳозирги кунда асосий вазифа мамлакатни иқтисодий тиклаш, тартиб ва ​​ижтимоий уйғунликни сақлаш бўлади. Фуқароларнинг тенг ҳуқуқлилиги, ирқчиликка қарши курашнинг муҳимлигини эслатиб, у "республика тартибини" таъминлаб, ҳуқуқ-тартибот идоралари ходимларини қўллаб-қувватлашини таъкидлади ва Франция ўз тарихида бирон бир номдан воз кечмаслигини ва қаҳрамонларига ўрнатилган бирон бир ёдгорликни олиб ташламаслигини таъкидлади.

Президент Макрон июл ойидаги чиқишида жонланиш дастури тафсилотларини эълон қилишга ваъда берди.