Германия иқтисодиёти институти раҳбари Михаэл Хютер, агар Европа Иттифоқининг айрим давлатлари Россиядан газ етказиб бериш тўхтатилиши мумкинлиги сабабли қўшни давлатлар билан бўлишишдан бош тортса, Европа газ бозори қулашини башорат қилди. Бу ҳақда Welt am Sonntag хабар бермоқда.

«Европа Иттифоқи Россиядан етказиб бериш тўхтатилган тақдирда ҳам давлатлар ўртасида газ оқими давом этишини таъминлаши керак. Айрим давлатлар қўшни давлатларга етказиб беришни тўхтатадиган вазият бўлмаслиги керак. Бу Европа ва барча қўшни давлатлар билан газ алмашувчи Германия манфаатларига тўғри келади», — деди эксперт.

Хютер, шунингдек, Европа таъминот занжирларини бузмасликка чақирди. «COVID-19 пандемияси бошланганидан сўнг, Европа Иттифоқининг баъзи давлатлари ўз чегараларини ёпдилар, бу Европа Иттифоқига товарлар ва материалларни ташишга катта таъсир кўрсатди. Агар газ узилиб қолса, бундай ҳолат такрорланмаслиги керак», - дея тушунтирди у.

Унинг сўзларига кўра, агар Европа Иттифоқи мамлакатлари «фақат ўзларини ўйласа», газ саноатининг тўхтаб қолиши муқаррар бўлади. «Европа газ бозорининг қулаши компаниялар ва истеъмолчилар учун ҳалокатли оқибатларга олиб келиши билан таҳдид қилмоқда», - дея хулоса қилди у.

Аввалроқ, таҳлилчи Кристоф Герварц Европа Иттифоқида газ тақчиллиги бўйича умумий режа йўқ, чунки иштирокчи давлатлар бу борада келиша олмаганини айтган эди. Герварцга кўра, агар инқироз пайтида фақат ўз энергия таъминоти ҳақида ўйласа, кўплаб мамлакатлар ёқилғисиз қолиш хавфи остида қолади.