Ўтган ҳафта Макаода ушбу махсус маъмурий бирликнинг Португалия қўл остидан Хитой бошқарувига ўтганининг 20 йиллиги нишонланди, АҚШ Конгрессининг Вакиллар Палатаси президент Доналд Трампнинг импичменти учун овоз берди, Байрутда адолат талаб қилганлар яна кўча намойишларига чиқди. Қароргоҳи Лондонда жойлашган The Guardian нашри ўтган ҳафта бутун дунёда содир бўлган шу ва бошқа воқеаларнинг ўз наздидаги энг муҳимларига диққат қаратди.

Норозилик ҳаракатлари давом этаётган Сантягода намойишчи ерда ётган Чили хавфсизлик кучлари ходими олдида ўт ўчирувчи балонни ушлаб турибди.

Янги Жанубий Уэлс штатида Теҳмур шаҳарчаси яқинидаги ўрмон ёнғини узоқдан кўриниб турибди. Австралиянинг шарқий соҳиллари бўйлаб бир неча ҳафтадан буён давом этаётган ёнғинлар вақтида бир неча кун олдин икки кўнгилли ўт ўчирувчи ҳалок бўлди.

Каталония мустақиллиги тарафдорлари ва Барселона футбол клуби ишқибозлари Мадриднинг Реал клубига қарши ўйин олдидан Ноу Камп стадиони ёнида тўпланиб, ўз норозилигини билдирди. Минглаб полиция ва хавфсизлик кучлари Каталония айирмачилари бу ўйинга тўсқинлик қилмаслиги учун жалб этилди.

Москвада Россия Федерал Хавфсизлик Хизматининг машҳур Лубянкадаги биноси яқинида отишма содир бўлди. Воқеа оқибатида ФХХнинг бир ходими ҳалок бўлди, яна икки ходими оғир жароҳат олди. "Коммерсантъ нашрининг хабар беришича, ҳужумчи бир ўзи ҳаракат қилган ва бино ичига бостириб кирмаган. Хизмат зобитлари бино атрофини ёпиб, қўриқлаб турибди.

Сантягодаги аксилҳукумат норозиликлар вақтида хавфсизлик кучлари зобити намойишчини қувлаб кетяпти.

Сомалилик оддий аҳоли ва аскарлар дам олиш кунида соҳилда Могадишу аэропортига қўнаётган ҳарбий самолётни кузатяпти. Дунёдаги энг қашшоқ мамлакатлардан бўлган Сомали қарийб ўттиз йилдан бери фуқаролар урушидан азият чекади.

Уруш оқибатида вайрон бўлган қадимий Сано шаҳри атрофидаги мактаблардан бири. БМТнинг айтишича, Яманда деярли беш йилдан бери давом этаётган уруш 12 миллиондан ортиқ боланинг ҳаётига таъсир қилган.

АҚШ Конгресси Вакиллар Палатаси спикери Ненси Пелоси президент Доналд Трампнинг импичменти кўриб чиқиладиган мажлисга кириб кетмоқда. Шу мажлисда Трампга импичмент эълон қилинди. Энди 2020 йил январида бу ишни Конгресснинг юқори палатаси бўлган Сенат кўриб чиқади.

Аксилҳукумат намойишчилар Байрут марказидаги парламент кўчаси яқинида хавфсизлик кучлари билан тўқнашяпти. Ливан полициячилари юзлаб норозиларни кўздан ёш оқизувчи газ, резина ўқ ва сув сепиб бостиришга ҳаракат қилмоқда.

Лиондаги норозиликлар вақтида қўлида машъала тутган намойишчи. Франция бўйлаб юз минглаб намойишчилар ҳукуматнинг пенсия ёшини кўтариш сиёсатига қарши норозилик уюштирмоқда.

Хитойдаги энг йирик чучук сувли кўл – Поянгнинг қуриган соҳилида ташлаб кетилган балиқчилар қайиқлари. 1 январдан бошлаб Хитой ҳукумати мамлакатдаги энг узун дарё бўлган Янцзи оқиб ўтадиган қатор ҳудудларда балиқ овлашни ман қилади. 2021 йилга бориб эса Поянг кўлида балиқ овлаш камида 10 йилга тақиқланади.

Президент Си Жинпинг “Макао севгиси, Хитойнинг юраги” номли тадбир саҳнасида. Бу тадбир Макао шаҳри Португалиядан Хитой бошқарувига ўтганига 20 йил тўлиши муносабати билан ташкиллаштирилган.