Ўтган ҳафта Гаагадаги Халқаро Адолат Судида (International Court of Justice – ICJ) Мянмадаги Роҳинжа мусулмонлари қирғини бўйича иш кўрила бошлади, Сантягода аксилҳукумат намойишчилар ва полиция ўртасидаги тўқнашувлар давом этди, Финландияда 34 ёшли Санна Марин дунёдаги энг ёш бош вазирга айланди, Ҳонгконгда демократияни қўллаб-қувватлаб оммавий кўча намойиши уюштирилди. Қароргоҳи Лондонда жойлашган The Guardian нашри ўтган ҳафта бутун дунёда содир бўлган шу ва бошқа воқеаларнинг ўз наздидаги энг муҳимларига диққат қаратди.

Грецияга қарашли Хиос (Chios) оролидаги муҳожирлар лагерида болалар олов ёқиш учун тўплаб қўйилган зайтун дарахти шохларини ўйнаяпти. Лагерда йиғилган минглаб қочқин ва муҳожирлар қиш ўртасида оғир шароитларда – сув ва электр токисиз яшаб келмоқда.

Британия бош вазири Борис Жонсон Ғарбий Лондондаги овозларни санаш марказида сайлов натижаларини эшитяпти. Жонсон парламент сайловларида Консерватор партия билан йирик ғалабага эришиб, шу пайтгача Лейбористлар партияси раҳбари Жереми Корбин мавқеи устунлик қилиб келган ҳудудларда ҳам устун чиқди. Энди “Брекзит” – Британиянинг Европа Иттифоқидан ажралиб чиқиши муқаррар бўлиб қолди.

Ўтган якшанба куни Ҳонгконгда демократик талаблар билан чиқаётган намойишлар оммавий кўча юришини ташкиллаштирди. Юз минглаб намойишчилар мана еттинчи ойдирки давом этаётган аксилҳукумат ҳаракатни қўллаб-қувватлаб чиқди. Кўча юриши сўнгги ҳафталардаги зўравонлик юз берган намойишлардан фарқли равишда тинч ўтди.

Янги Зеландияга қарашли Оқ орол, маори тилида Вҳакарида ўтган ҳафта вулқон отилиши натижасида осмонга кўтарилган оқ тутун ва чанг. Полициянинг айтишича, вулқон отилган пайтда оролда 50 га яқин сайёҳ бўлган, уларнинг 20 дан ортиғини Австралия фуқаролари ташкил этган. Табиий офат оқибатида 15 киши ҳалок бўлган, яна икки киши бедарак йўқолган.

“Янги Жанубий Уэлс” крикет жамоасининг ўйинчиси Лиам Ҳетчер тутунга бурканган майдон четида турибди. Майдон жойлашган Австралиянинг Сидней шаҳри ўтган ҳафта ўрмон ёнғинлари сабабли қуюқ тутун остида қолди, шаҳар ҳавосининг заҳарланганлик даражаси белгиланган меъёрдан 11 марта ортиб кетди. Мамлакат ўт ўчирувчиларининг иши эса юқори ҳарорат ва иссиқ шамол туфайли оғирлашмоқда.

Франциянинг Лион шаҳрида олти кундан буён ҳукуматнинг пенсия сиёсатига қарши оммавий намойишлар давом этяпти. Ҳукумат пенсияга чиқиш ёшини оширишни мақсад қилган.

Финландиянинг янги ва энг ёш бош вазири Санна Марин Брюсселда, Европа Иттифоқи саммитида матбуот анжуманида қатнашяпти. Оммавий ахборот воситаларида 34 ёшли Марин нафақат ўз мамлакати, балки дунёда ҳам энг ёш ҳукумат раҳбари эканлиги, иқлим ўзгаришлари сиёсатига эътибор қаратиши ҳақида ёзиляпти.

Мянма(Бирма)нинг фуқаровий етакчиси Аун Сан Су Чи Гаагадаги Тинчлик қасридан чиқиб кетяпти. Бу ерда Роҳинжалар қирғини бўйича очилган иш юзасидан учинчи кундирки суд эшитувлари бўляпти. Ғарбий Африкадаги ҳудуди кичик, аммо аҳолисининг 95%ини мусулмонлар ташкил этадиган Гамбия давлати Мянмани Роҳинжа мусулмонларини диний асосда қирғин қилишда айблаб Гаагадаги Халқаро Адолат Судига ариза берган. 1991 йилда тинчлик бўйича Нобел мукофотини олган ва 1989-2010 йиллар давомида баъзи танаффуслар билан жами 15 йил уй қамоғида ўтирган сиёсатчи эндиликда Мянма ҳарбийлари Роҳинжа мусулмонларига қарши қирғин уюштиргани ҳақидаги даъволарни рад этяпти.

Полиция зобити Сантягода ўтаётган навбатдаги норозилик ҳаракатлари асносида намойишчилар билан тўқнашяпти. Метродаги йўлкира ҳақлари кўтарилиши натижасида келиб чиққан аксилҳукумат намойишлар сабабли шу кунгача камида 24 киши ҳалок бўлди. Намойишчилар соғлиқни сақлаш ва таълим хизматлари яхшиланиши ҳамда Чилида умумий иқтисодий тенглик таъминланишини талаб қилиб келяпти.

Мисрнинг Миния вилоятидаги “Оқ тоғ” бўр конида оппоқ чангга беланган ишчилар қийин шароит ва ўта абгор хавфсизлик муҳитида арзимаган иш ҳақи учун оғир меҳнат қилади. Мамлакат аҳолиси йил сайин кўпайиб боряпти, иш ўринлари эса кам. Ҳукумат коррупцияга ботган. Шу сабабли ора-орада аксилҳукумат намойишлар бўлиб туриши Миср учун одатий ҳол.

Суриялик қочқин аёл фарзандлари билан Виал қочқинлар лагеридаги чодирида. Грециянинг Хиос оролида жойлашган лагер 1 000 кишига мўлжалланган, аммо айни пайтда бу ерда 5 000 га яқин бошпана изловчилар антисанитария шароитида яшаб келяпти.