Ҳиндистон жанубидаги Карнатака штатининг Ҳавери шаҳрида жойлашган коллежлардан бирида имтиҳон пайтида кўчирмакашликнинг олдини олишнинг антиқа усули қўлланди: талабаларнинг бошига картон қути кийдирилди.

Times of India нашрининг хабар беришича, ушбу “инновацион усул”дан кимё синови пайтида фойдаланилган. Картон қутиларнинг фақатгина олд томони очиқ бўлган.

Талабалардан бири олган расм ижтимоий тармоқларда яшин тезлигида тарқаб кетди. Танқид ва норозиликлар туфайли коллеж раҳбарияти картон қути усулидан воз кечганини маълум қилди.

Коллеж вакили МБ Сатишнинг айтишича, картон қутиларни талабаларнинг бошига кийдиришдан олдин уларнинг розилиги олинган.

“Имтиҳонда ҳамма ҳам бошига қути киймади, чунки бу мажбурий эмасди. Кийганлар эса истаган пайт ечиб қўйишди”, – деди у.