Америкалик бизнесмен Илон Маск дунё етакчилигини қисқа муддатга француз тадбиркори Бернард Арнога бой бериб, айни пайтда дунёнинг энг бой одами унвонини қайтариб олди, деб хабар бермоқда Bloomberg.
Агентлик маълумотларига кўра, бунга Tesla акциялари нархининг қарийб 70 фоизга ўсиши ёрдам берган. 2023 йилда Иқтисодий ўсиш белгилари ва Федерал захира томонидан фоиз ставкаларини оширишнинг секин суръати фонида инвесторлар хавфлироқ қимматли қоғозларга пул тикишга қайтишмоқда, деб ёзади Bloomberg.
Агентлик маълумотларига кўра, компания бир нечта моделлар нархини пасайтиргандан сўнг ўзининг электромобилларига бўлган талабнинг ортишидан ҳам фойда кўрди.
Bloomberg Billionaires Index маълумотларига кўра, Маскнинг бойлиги 187,1 миллиард долларга ошган, Арнонинг шахсий бойлиги 185,3 миллиард доллардан кўпроққа баҳоланмоқда.
2022 йил баҳорида Маск дастлаб Forbes дунёнинг энг бой одамлари рейтингида биринчи ўринни эгаллади, кейин унинг бойлиги 219 миллиард долларни ташкил этди. У Amazon асосчиси Жефф Безосни (171 миллиард доллар) сиқиб чиқарди. Ўшанда Арно 158 миллиард доллар билан учинчи ўринда эди.
Ўтган йилнинг 7 декабрида Маск Forbes рейтингида бир соат ичида икки марта етакчиликни йўқотиб, LVMH раҳбарига бой берди. Ўша ой охирида у ва француз бизнесмени ўртасидаги тафовут 11,8 миллиард долларни ташкил қилди. Маск 176,8 миллиард доллар билан иккинчи, Арно эса 188,6 миллиард доллар билан биринчи ўринни эгаллади.
Декабрь ойи охирида Маск 200 миллиард доллардан кўпроқ йўқотган дунёдаги биринчи одам бўлди. Bloomberg'нинг ёзишича, унинг бойлигининг катта қисми Tesla электромобиль ишлаб чиқарувчиси акциялари тушиб кетгани сабабли қисқарган.
Энг юқори чўққисида Маскнинг бойлиги 340 миллиард долларни ташкил қилган – тадбиркор бу кўрсаткичга 2022 йил 21 ноябрда эришган. Шунга қарамай, декабрь ойининг сўнгги ҳафталарида унинг капитали 137 миллиард долларгача камайди.
11 февраль куни агентлик Маскга яна дунёнинг энг бой одами бўлиш учун 6 миллиард доллардан сал кам қолгани ҳақида хабар берилган эди. Ўшанда бизнесмен 179 миллиард доллар билан иккинчи ўринда, 185 миллиард долларга эгалик қилган Арнодан кейинги ўринда эди.