Илон Маскнинг айтишича, Starship 5 йил ичида Марсга учувчисиз парвозни амалга ошириши мумкин.

Американинг SpaceX компанияси асосчиси Илон Маск Starship ракетасининг Марсга учирилиш вақтини маълум қилди. Бу ҳақда Financial Times’га таяниб, «РИА Новости» хабар бермоқда.

Унинг сўзларига кўра, космик кема 3-5 йил ичида Марсга учувчисиз парвозни амалга ошириши мумкин. «Ўйлайманки, агар у муваффақиятли бўлса, биз ўн йиллик охиригача Марсга экипажли миссияни жўнатишимиз мумкин», деди у.

Маскнинг сўзларига кўра, Марсга парвозлар учун «эшиклар» ҳар икки йилда очилади. Унинг қўшимча қилишича, Ер орбитасидан Марс орбитасига парвоз қилиш учун сайёраларнинг керакли позицияси ҳар 26 ойда бир марта ўрнатилади.

«Умид қиламанки, биз бу ёзда, кейинги икки ёки уч ой ичида биринчи [Starship] уринишимизни амалга оширамиз», деди у.

Аввалроқ, Илон Маск Starship  кўп марта фойдаланиладиган транспорт тизимининг орбитал парвози амалга оширилиши мумкин бўлган ойни номлаган эди. «Кейинги ойга қадар биз 39 та парвозга тайёр двигателни тугатамиз, кейин уларни амалга ошириш учун яна бир ой керак бўлади, шунинг учун май ойида орбитал парвозга умид қиламан», деди тадбиркор.