Бугун 12 сентябрь куни «Азон китоблари» марказида ислом оламида машҳур, жуда ҳам муҳим манба – «Катта фиқҳ энциклопедияси» китобининг тақдимот маросими бўлиб ўтди.
Таниқли олим Ҳасанхон қори Яҳё Aбдулмажид томонидан Қуръон тиловати ила бошланган тақдимот маросимида Azon.uz, Azon TV ва Azon китоблари лойиҳалари раҳбари устоз Мубашшир Aҳмад, ушбу энциклопедиянинг таржимонлар гуруҳи раҳбари Aбдулҳодий Ғиёс домла, олима устоз Одинахон Муҳаммад Содиқ ва шунингдек кўплаб илм аҳллари, ёш китобхонлар, талабалар ва ОАВ вакиллари қатнашди.
Маросимда қатнашган Sof.uz мухбирининг маълум қилишича, тадбирда устоз Мубашшир Aҳмад, Ҳасанхон Яҳё Aбдулмажид ҳамда Одинахон Муҳаммад Содиқлар ушбу китоб ва унинг муаллифлари ҳақида бир қанча маълумотларни бериб ўтди.
Маълум қилинишича, 200 дан ортиқ Ислом уламоларининг 40 йиллик меҳнатлари самараси бўлган ушбу китоб араб тилида 45 жилддан иборат. Китоб ҳозирча фақат урду тилига таржима қилинган бўлиб, уни ўзбек тилидаги таржимаси 47 жилд бўлиши маълум қилинди. Китобнинг ўзбек тилидаги биринчи жилди 1000 нусхада чоп этилган.
Бундан ташқари китоб ҳақида фикр билдирган таржимонлар гуруҳи раҳбари Aбдулҳодий Ғиёс таржима жараёнида бўлган қизиқарли воқеа-ҳодисалар ва илм баҳс-мунозаралари ҳақида сўзлаб ўтди.
Шунингдек ушбу тақдимот маросими жонли эфирда ёритиб борилди.
Тақдимот сўнгида барча китоб мухлислари таржимонлар устоз Мубашшир Аҳмаднинг дастхатлари билан китобларни харид қилишни бошлади. Бу халқимизнинг бу буюк китобни қанчалик интизор бўлганини билдиради.