Испания ўз тарихида энг узоқ мотам эълон қилди

Испания ўз тарихида энг узоқ мотам эълон қилди

Испания мамлакатдаги коронавирус пандемиясининг ўн минглаб қурбонлари учун расмий 10 кунлик мотам кунини бошлади.

Чоршанба кунидан бошлаб мамлакат бўйлаб жамоат биноларидаги ва Испаниянинг денгиз кемаларида барча байроқлар 5 июнга қадар ҳаётини йўқотган 27000 дан ортиқ одамларга ҳурмат бажо келтириш учун ярмигача туширилади.

Испания Бош вазири Педро Санчес Твиттерда "бу бизнинг демократиямиздаги энг узоқ мотам даври, 10 кун давом этади, унда биз ҳаммамиз қайғумизни изҳор қиламиз ва вафот этганларга таъзим қиламиз" деди.

Ҳукумат матбуот котиби Мария Хосе Монтеронинг сўзларига кўра, сешанба куни ҳукумат йиғилишида қабул қилинган мотам даврида, шунингдек, Испания давлатининг раҳбари қирол Филип VI раислик қиладиган тантанали маросим ўтказилади.

Ўлганлар "кутилмаганда йўқ бўлиб кетган ва дўстлари ва оила аъзоларини тўсатдан йўқолишидан ва юзага келган оғир ҳолатлардан азоб чекаётган эркаклар ва аёллардир", - деди у вазирлар маҳкамаси мажлисида.

"Қурбонларнинг ҳар ўнтасидан саккизтаси 70 ёшдан катта эди. Улар бугунги кунда биз биладиган мамлакатни барпо этишда ёрдам берганлар".

Чоршанба куни ҳолатига кўра, мамлакатда 236 минг киши коронавирус юқтириб олди. 27 111 киши вафот этган. Жами 150 мингга яқин бемор даволаниб чиқди.