Жаҳон банки COVID-19 коронавирусига қарши курашиш ва аҳолининг кам таъминланган қисмини қўллаб-қувватлаш учун Ўзбекистонга 95 млн доллар ажратишга қарор қилди.

«Жаҳон банкининг молиялаштириши халқаро ривожланиш бўйича ҳамкорлар коалицияси томонидан ташкил этилган аҳолини пандемия хавфидан ҳимоя қилишда ҳукуматга кўрсатилаётган ёрдамнинг бир қисми сифатида тақдим этилади», - деди Жаҳон банкининг Ўзбекистондаги ваколатхонаси раҳбари Хидеки Мори. «Ҳукумат, Жаҳон соғлиқни сақлаш ташкилоти (ЖССТ), БМТнинг бошқа агентликлари, халқаро молиявий институтлар, шу қаторда Жаҳон банки гуруҳи, икки томонлама ёрдам агентликлари ва нодавлат ташкилотлар, шу жумладан Чегара билмас шифокорлар ушбу оғир вазиятда мамлакатни қўллаб-қувватлашда хайрихоҳлик билдиришмоқда».

Ушбу маблағнинг 38 млн доллари миллий соғлиқни сақлаш тизимини такомиллаштиришга сарфланади.

Лойиҳа бўйича $57 млн атрофидаги маблағлар кам таъминланган оилаларни қўллаб-қувватлаш ва ишсиз фуқароларга бир марталик тўловларни амалга ошириш бўйича давлат дастурларини кенгайтириш учун сарфланади.