Ҳиндихитой яриморолида жойлашган Камбожа давлати ҳукумати қўшни Лаос ҳукуматига ултиматум қўйди, дея хабар бермоқда Al Jazeera​ телеканали.

Маълум бўлишича, апрел ойида Лаос армиясига қарашли 30 нафар ҳарбий чегарани бузиб ўтиб Камбожа ҳудудига бостириб кирган. Камбожа ҳукумати бир неча маротаба лаослик аскарлардан чегара ҳудудини тарк этишни талаб этганига қарамасдан, аскарлар мамлакат шимлидаги Стунг Тренг вилояти ҳудудида қолмоқда.

Камбожа бош вазири Ҳун Сен жума куни эълон қилган баёнотда айтилишича, Лаос ҳукуматига тегишли тартибда ултиматум юборилган. Бош вазирнинг таъкидлашича, Лаос бош вазири Тҳонглоун Сисоулитҳдан аскарларни зудлик билан Камбожа ҳудудидан олиб чиқиб кетиш талаб қилинган.

Ҳун Сен ҳукумати қўшни давлатдан ҳеч қандай шарт ва келишувларсиз ҳарбийларни олиб кетишни сўраган. Бош вазирнинг айтишича, Лаос ҳукуматидан 17 августгача талабни бажариш сўралган бўлиб, талабнома бажарилмаган тақдирда, Камбожа армияси қурол ишлатишга мажбур бўлишидан огоҳлантирилган.

Айни пайтда Камбожa армияси жанговар ҳолатга ўтказилиб, қўшинларни Лаос билан чегара томон ҳаракатга келтиришга буйруқ берилган. Ҳаракатга келтирилган Камбожа армияси аскарлари кўплаб ракеталар билан қуроллантирилган.

Ҳун Сеннинг айтишича, унинг мамлакати қўшнилар билан урушиш ниятида эмас. Бош вазир Камбожа ҳудудини қайтариб олишни истаётганини маълум қилган. Камбожа ва Лаос ўртасида аниқланмаган 540 кмлик чегара мавжуд. Чегарада яхши тартиб ўрнатилмагани боис, Лаос орқали Камбожага катта миқдорда гиёҳванд моддалар контрабанда қилинади.