АҚШнинг Каролина штатидаги қора танлилар черковига амалга оширилган террористик ҳужум учун Дилан Руфга ўлим жазоси тайинланиши мумкин. Бу ҳақида Reuters агентлиги хабар бермоқда.

22 ёшли Дилан Руф 2015 йилнинг 17 июньида Жанубий Каролина штатининг Чарлстон шаҳридаги афро-америкаликлар черковига бостириб кириб 9 кишини ўлдирган ва бир кишини ярадор қилган эди.

Асли келиб чиқиши америкалик оқ танлиларга мансуб бўлган террорчи 33 турдаги оғир жиноятларни содир этишда айбланмоқда. Улар орасида ирқий камситиш, диний камситиш, диний амалларни бажаришга тўсқинлик қилиш, қасддан одам ўлдириш, ноқонуний қурол ишлатиш каби ўта оғир жиноят турлари санаб ўтилган.

Суд ҳайъатини танлашнинг сўнгги босқичи душанба куни бошланган. Руфнинг иши бўйича судьяларни танлаш жараёнининг охирги босқичи икки ҳафта давом этади. Судьяларни танлаш жараёни сентябрь ойида бошланган эди. 700 кишидан кўпроқ одам 3 минг нафар судья орасидан муносибларини танлаб олиш учун сўровномаларда қатнашган. Суд жараёнида 12 нафар судья ҳамда 6 нафар захирадаги судья қатнашиши белгиланагн.

Жиноят ишига оид ҳужжатлардан маълум бўлишича, Дилан Руф ўлим жазоси бекор қилинадиган бўлса, жиноятни тан олишга рози бўлган. Унинг иши келаси йили штат судида ҳам кўриб чиқилади. Шунда ҳам у ўлим жазосига ҳукм қилиниши ҳаққатга яқинроқ. Прокурорлар берган маълумотга кўра, террорчи бу жиноятни узоқ вақт режалаштирган ва кимни нишонга олишни олдиндан мақсад қилган.