КХДР етакчиси Ким Чен Иннинг ўгай акаси Ким Чон Нам Малайзияда ўлдириб кетилди. Бу ҳақда, Жанубий Корея ҳукуматидаги манбага таяниб, Yonhap агентлиги маълум қилди.

Агентлик маълумотига кўра, Ким Чон Намга Куала-Лумпур шаҳри аэропортида заҳарли игна билан қуролланган икки аёл ҳужум қилган. Жиноятчилар воқеа жойидан яширинганлиги маълум қилинмоқда. Малайзия қотиллик ортида Шимолий Кореянинг ўзи турганлигини тахмин қилмоқда. 

Малайзия полицияси Reuters агентлигига шимолий кореялик шахси номаълум эркак Куала-Лумпур аэропортидан шифохонагача бўлган йўлда вафот этганлигини маълум қилган.

«Википедия» маълумотига кўра, 1971 йилнинг 10 майида туғилган Ким Чон Нам КХДРнинг аввалги раҳбари Ким Чен Ирнинг никоҳсиз туғилган катта ўғли эди. Унинг онаси актриса Сон Хе Рим. У давлат раҳбари меросхўри сифатида қаралмаган, аммо у маълум вақт ҳукуматда юқори лавозимни эгаллаб турган. 2001 йилда у Японияга Доминиканнинг сохта паспорти орқали киришга ҳаракат қилганида қўлга олинган ва бундан икки давлат муносабатларида таранглик юзага келган, оқибатда у отасининг ғазабига учраган. 2011 йилда Ким Чен Ирнинг вафотидан кейин, янги ҳукумат Ким Чон Намнинг амакисини қатл қилди, шундан сўнг у мамлакатдан чиқиб кетган ва ватанга қайтиб келмаган.