Тошкент ҳокимияти, шунингдек Инвестициялар ва ташқи савдо вазирлиги ҳамда Иқтисодиёт ва саноат вазирлиги пайшанба куни бўлиб ўтган матбуот анжуманида Tashkent City лойиҳаси ва Ўзбекистондаги бошқа инвестицион лойиҳаларда ёш хориж компаниялари иштирокига оид саволларга жавоб берди.

Британиянинг Open Demokracy нашри яқинда ўтказган изланишларида Tashkent City 3-лотининг асосий инвестори ҳисобланган Германиянинг Hyper Partners компаниясининг (Дитценбахда 2018 йил 22 январда рўйхатга олинган) ягона эгаси 19 ёшда эканини аниқлаган эди.

Инвестициялар ва ташқи савдо вазири ўринбосари Лазиз Қудратов бир-бир ярим йил аввал ташкил этилган компаниялар — дунё амалиётида одатий ҳол эканини қайд этди.

«Бу оддий амалиёт, у бутун дунёда қўлланилади. Кўплаб компаниялар қандайдир лойиҳани амалга ошириш уун янги тузилмаларни ташкил этади… Шундай атама бор — special purpose vehicle (SPV/лойиҳа компанияси — таҳр.). Бу каби лойиҳаларнинг молиявий бошқаруви, солиқ тўловларини янада самарали ташкил этиш учун асосий компаниялар шўъба тузилмаларини ташкил этади, Hyper Partners ҳам шулар жумласидан», — деди у.

Унинг сўзларига кўра, Ўзбекистон компаниялар таъсисчилари тўғрисида қўшимча маълумотларни талаб қилишга ҳақли эмас.

«Қонун бўйича биз муассислар тўғрисида қўшимча маълумотларни талаб қилишга ҳаққимиз йўқ. Биз инвесторлар маблағ киритиши учун шартлар қўямиз, лойиҳани амалга ошириш бўйича юридик мажбуриятларни зиммамизга олдик, ҳужжатларга имзо қўйдик ва улар ишлай олишади», — деди Лазиз Қудратов.

«Биз 700 дан ортиқ музокаралар олиб бордик, ушбу лойиҳага ишонадиган инвестор топиш жуда қийин бўлди. Шунинг учун биз Германия компаниясидан бундай таклифни олганимиздан сўнг: „Хуш келибсиз“, дедик», — дея қўшимча қилди вазир ўринбосари.

Тошкент ҳокими Жаҳонгир Ортиқхўжаев асосий вазифа, бу — Tashkent City лойиҳасини амалга ошириш эканини таъкидлаб ўтди.

«Бу компания кеча ёки кечадан олдинги кун ташкил этилгани муҳим эмас. Бироқ мен лойиҳа амалга оширилаётганини кўрсатишим мумкин. Улар ишни бошлади, улардан пулларни қаердан олганлари, улар банк орқали қандай келганини сўраш бизнинг ваколатимизга кирмайди. Энг асосийси — лойиҳа амалга оширилмоқда, энг асосийси — хориж компанияси бозоримизга маблағ киритмоқда. Агарда ҳар бир инвестордан бенифициарини сўрасак, Ўзбекистон дарвозасини ёпаверсак бўлади, бу ерга ҳеч ким келмайди», — деди Тошкент маъмурияти раҳбари.