Кореянинг Hyundai автомобиль гиганти АҚШнинг Алабама штатидаги SMART Alabama LLC концернининг маҳаллий шўба корхонасига қарашли заводда болалар меҳнатидан фойдаланганликда айбдор деб топилди.
Reuters агентлиги заводнинг собиқ ва ҳозирги ходимлари, шунингдек, ноқонуний ишчи ёлловчилар билан суҳбат ўтказди ва заводда 12 ёшли ўнлаб болалар ишлаганини аниқлади.
SMART заводи Hyundai’нинг худди шу штатдаги Монтгомери шаҳридаги флагман автомобиль заводидаги йиғиш линиясига эҳтиёт қисмлар етказиб беради.
Хусусан, Reuters корхонада Гватемаладан келган мигрантлар оиласининг Энтерпрайз шаҳрида яшовчи уч нафар фарзанди ишлаганини тасдиқлашга муваффақ бўлди. Июль ойида 14 ёшга тўладиган қиз ва унинг 12 ва 15 ёшли икки укаси 2022 йил бошида SMART заводида ишлаган ва мактабга бормаган. Версияни уларнинг отаси Педро Ци ва маҳаллий полиция ҳам тасдиқлаган.
Бундан ташқари, собиқ SMART ходимининг айтишича, корхонада 50 га яқин вояга етмаган ишчилар турли сменаларда ишлаган, уларнинг айримларини шахсан ўзи таниган. Уларнинг сўзларига кўра, вояга етмаганлар корхонада ишлаш учун мактабни ташлаб кетишган.
Нашр SMART заводида ишлаётган болаларнинг аниқ сони, уларнинг иш ҳақи ва бошқа меҳнат шароитларини аниқлай олмади.