Тарихда бундай ҳоллар кўп учраган. Коррупция, порахўрлик давлат ва жамиятни емирувчи куч бўлганлиги сабабли ҳукмдорлар ўта шафқатсиз жазоларга қўл уришган. Диққат: асаби бўшлар кўриши тавсия этилмайди.
Осиш
Пётр Iнинг буйруғига кўра Сибир губернатори М.Гагарин коррупцияда айбланиб дорга осилган. Унинг жасадини бошқа амалдорларга ибрат тариқасида кўрсатишган.
Танани чўзиш ва чархпалакка тортиб ўлдириш
Граф Гагаринни фош этган обер-фискал А.Нестеровнинг ўзи таъмагирликда айбланган. Уни дарралашган, ярасига туз сепиб, куйдиришган ва танасини чўзишган
Терисини шилиш
Геродотнинг ҳикоя қилишига кўра эрамиздан аввалги VI асрда шоҳ Камбиз пора олиб ноҳақ ҳукм чиқарган судьянинг терисини шилдирган.
Тўртга бўлиш
Кумуш тангалар ютган ғозни Иван Грозний амалдорларидан бирига “ҳадя” тариқасида туҳфа қилишган. Амалдор эса даҳшатли жазога учраган.
Қўлини кесиш
Ўрта асрларда Швецияда пора олган судьянинг қўлини кесишган. Қизиғи шундаки, жазодан сўнг ишдан бўшатишмаган.
“Оломон”га талатиш
Оломон бир бурдадан берса тўйдиради, бир муштдан урса ўлдиради. 1648 йилда подшоҳ Алексей Михайлович юлғич мансабдорларидан бирини оломон ихтиёрига топширган.
Қамоқ ва жарима
Нафси ҳакалак отган жисмоний шахсларни АҚШда 40 йиллаб қамоқ жазоси билан “сийлашади”. Юридик шахсларга эса юзлаб миллион доллар жарима солинади. Буюк Британияда коррупционер 20 йилгача “кесилиши” мумкин.
...Қочган ва заҳар ичган
Сингапурда вазирдан тортиб унинг қариндошларигача барчасини махсус хизмат назорат қилади. Жазо муқаррарлигини сезган айбдор депутатлардан бири мамлакатдан тирақайлаб қочиб чиқиб кетишни, 400 минг долларни “еб қўйган” ҳукумат аъзоси эса заҳар ичиб ўлишни афзал кўрган.
Отиш
КХДРда амалдорларнинг даражасидан қатъи назар жосуслик ёки саботаж учун олий жазога тортилаверади. Яқинда молия вазирини пул ислоҳотлари инқирозга учрагани учун қатл этишди.
Намойишкорона отиш
Хитойда амалдорларнинг ўлим жазоси ижросини ТВ орқали кўрсатишади. Энг ками 1 млн юан (150 минг доллар) пора учун отиш жазоси қўлланади. Сўнгги йиллар ичида ХХРда 10дан ортиқ амалдорни отишди (улар орасида Пекиннинг вице-мэри, пойтахт аэропортининг собиқ директоригача бор). Коррупционернинг мол-мулки мусодара қилинади, яқинларидан эса 8 юан (1,2 доллар) турадиган ўқ пулини тўлаб қўйишлари сўралади.