Меҳнат миграцияси агентлиги фуқароларни бепул касбга ўқишга таклиф қилмоқда

Меҳнат миграцияси агентлиги фуқароларни бепул касбга ўқишга таклиф қилмоқда

Фото: Яндекс

Ташқи меҳнат миграцияси агентлиги хорижда вақтинча меҳнат фаолиятини амалга ошириш истагида бўлган фуқароларни касбга йўналтириш марказларига ўқишга таклиф қилмоқда.

Касбга йўналтириш марказлари қуйидаги манзилларда жойлашган:

Бухоро шаҳар, Халқлар дўстлиги кўчаси 4-уйда жойлашган Бухоро архитектура ва қурилиш коллежида сувоқчи, бўёқчи, ғишт терувчи, тикувчи, темир бетон ва пўлат конструкцияларни монтажлаш, бетончи, арматурачи йўналишларида;

Жиззах шаҳридаги Жиззах архитектура ва қурилиш коллежида ғишт терувчи, керамик плиталар (кафель) териш, сув, газ, иссиқлик тизими ва канализация қувурларини монтаж қилиш (сантехника), темир бетон, кўтарма кран бошқарувчисининг ёрдамчиси йўналишларида;

Наманган вилояти, Учқўрғон тумани, Мустақиллик кўчаси 46-уйда жойлашган Учқўрғон ахборот технологиялари ва сервис касб-ҳунар коллежида электромонтёр ва тикувчилик йўналишларида;

Қашқадарё вилояти Шаҳрисабз шаҳри Файзулло Хўжаев кўчасида жойлашган Шаҳрисабз шаҳридаги ишсиз ва банд бўлмаган аҳолини касб-ҳунарга ўқитиш марказида электр монтажчи, электроника ва тикувчилик йўналишларида касб-ҳунар ўргатилади.

Йўналишлар бўйича ўқув-курслари 1 ойдан 3 ойгача давом этади ва якунида сертификатлар берилади.

Ўқув-курсларида бепул ўқиш истагидаги фуқаролар ҳудудидаги туман (шаҳар) бандликка кўмаклашиш марказларидан ишсизлиги ҳақида маълумотнома олиб келган тақдирда, ҳар бир фуқаро учун Бандликка кўмаклашиш жамғармаси ҳисобидан 4 базавий ҳисоблаш миқдоридан ошмаган миқдорда грантлар ажратилади.

Маълумот учун: +99871 202 33 55 (ички рақам 59)

E-mail: [email protected]