Кеча, 19 январь куни Англия Премер-лигасининг 23-туридан ўрин олган марказий ўйинда “Ливерпул” ўз уйида, Энфилд стадионида “Манчестер Юнайтед”ни қабул қилди. Бу ўйинда ҳамма “Ливерпул”нинг йирик ҳисобдаги ғалабасини кутаётган эди. Чунки жамоа охирги 22 та ўйиндан бери мағлубият нималигини билмай келяпти, шунингдек ҳозирги кунда ажойиб спорт формасига эга.

“Манчестер Юнайтед” сафида эса асосий ўйинчилардан бир нечтаси жароҳат туфайли ўйинларда иштирок эта олишмаяпти, жамоанинг ҳам унчалик омади келмаяпти.

Ўйин кутилганидек бошланди: Ливерпул дастлабки 20 дақиқаликда тинимсиз ҳужумлар ёмғирини ёғдирди. Бунинг натижасида, Ван Дейк ўйиннинг 14 дақиқасида ҳисобни очди, дастлабки таймдаги жамоанинг яна бир голи VAR тизими орқали бекор қилинди.

Деярли ёш ва янги ўйинчилар таркиби билан “Манчестер Юнайтед” ўйиннинг иккинчи таймида кутилмаганда Ливерпулга босимни кучайтирди. Айниқса, охирги 10 дақиқаликда тўпга эгалик қилиш нисбати меҳмонларда 85 фоизгача кўтарилиб кетди. Лекин манчестерликларга омад кулиб боқмади, кўплаб ҳужумлар ва зарбаларнинг бирортаси ҳам гол билан якунланмади. Ўйинга қўшиб берилган дақиқаларда (90+3 дақиқада) Ливерпул қарши ҳужумга ўтиб кетди ва Муҳаммад Салоҳ жамоасининг иккинчи ва ўзининг “Манчестер Юнайтед”га илк голини урди.

Шундай қилиб, Салоҳ “Манчестер Юнайтед”га гол уролмаслиги ҳақидаги “қора тушлар”га чек қўйди.

Ғалабадан сўнг “Ливерпул” очколарини 64тага етказиб, энг яқин таъқибчиси “Манчестер Сити”дан 16 очкога ўтиб кетди. “МЮ” эса 34 очко билан 5-ўринда қолди.

Ўйинни хавфли вазиятлар ва голлар билан ушбу видеороликда танишишингиз мумкин: