Наманган вилояти Янгиқўрғон туманида ўзгаларнинг қорамолларини ўғирлаш билан шуғулланиб келган уч кишидан иборат гуруҳ аниқланди. Бу ҳақда вилояти ИИБ ахборот хизмати хабар берди.

Хабарга кўра, 15 июнь кунига ўтар кечаси Янгиқўрғон туманида яшовчи 16, 17 ва 23 ёшли йигитлар 1981 йилда туғилган фуқаронинг яшаш уйи ҳовлисига девор ошиш йўли билан кириб, дарахтга боғлаб қўйган нархи 15 миллион сўмлик икки бош молларини ўғирлаб кетган.

Улар ўзларининг жиноий ҳаракатларини давом эттириб, шу куннинг ўзида 1979 йилда туғилган фуқаронинг яшаш уйи ҳовлисига кириб, молхонасида бўлган нархи 15 миллион сўмлик икки бош молини, шунингдек, 43 ёшли фуқаронинг молхонасидан 20 миллион сўмлик икки бош молини ўғирлаб кетган.

Ушбу ҳолат бўйича Янгиқўрғон туман ИИБ ҳузуридаги Тергов бўлими томонидан Жиноят кодексининг 169-моддаси (ўғрилик) 3-қисми билан жиноят иши қўзғатилган.