18 октябрь кунги савдолар чоғида Brent нефть нархи пасайди. Лондоннинг ICE биржаси маълумотларига кўра, декабрь фьючерсларининг нархи бир баррель учун 90 доллардан пастга тушиб, икки фоиздан кўпроқ йўқотди.

Нарх Хитойда талабнинг камайиши, шунингдек, Қўшма Штатларнинг захиралардан қўшимча нефть ҳажмини чиқариш нияти билан боғлиқ хавотирлар фонида пасаймоқда, дея қайд этмоқда Reuters манбаси.

Дунёнинг энг йирик нефть импортчиси Хитойга нисбатан ноаниқлик Пекиннинг 18 октябрга белгиланган иқтисодий маълумотларни эълон қилишни кечиктириш қарори билан боғлиқ. Шу билан бирга, янги сана ҳам айтилмаган ва таҳлилчиларнинг таъкидлашича, мамлакат ялпи ички маҳсулоти ўсиши билан боғлиқ саволлар ҳукуматнинг коронавирусга нисбатан қўллаган сиёсатига боғлиқлиги тахмин қилинмоқда.

АҚШнинг 10 миллиондан 15 миллион баррелгача захирадан чиқариш режаси ҳам таклифнинг ўсиши нуқтаи назаридан бозор кайфиятига таъсир қилди, деди UBS таҳлилчиси Жованни Стауново.