Нима учун Жисмоний тарбия университети талабаларига ҳалигача стипендия тўланмаганига изоҳ берилди

Нима учун Жисмоний тарбия университети талабаларига ҳалигача стипендия тўланмаганига изоҳ берилди

Олий ва ўрта махсус таълим вазирлиги ижтимоий тармоқларда Ўзбекистон давлат жисмоний тарбия ва спорт университетида талабаларга стипендия берилмаётганлиги ҳақидаги хабарларга изоҳ берди.

Хабарда айтилишича, ҳолат вазирлик томонидан тезкор равишда ўрганилган. 2019/2020 ўқув йилидан бошлаб талабаларга тўлов-контракт қиймати миқдорлари икки хил кўринишда – “стипендияли” ва “стипендиясиз” этиб белгиланди.

Шу сабабли, университетда тўлов-шартнома асосида ўқийдиган талабаларга стипендия тайинлаш ва беришдаги кечикишлар ўз навбатида талабалар томонидан тўловларни турли миқдорда ва вақтда амалга оширилиши билан боғлиқ, дейилади вазирлик хабарида.

Айтилишича, ҳозирда барча ташкилий масалалар якунига етган ва тўлов-шартнома асосида ўқийдиган талабаларнинг пластик карталарига стипендия ўтказиб берилган.

Стипендиянинг нақд пул қисми эса, 18 ноябрь – душанба кунидан тарқатилиши маълум қилинган.

Шунингдек, Олий ва ўрта махсус таълим вазирлиги талабалар, уларнинг ота-оналари, кенг жамоатчилик вакиллари билан мулоқот қилишга тайёрлигини билдириб, муаммолар мавжуд бўлса, мана бу ерга ёзиб қолдириш мумкинлигини айтди.