Япониянинг Тохоку университети олимлари қўзиқоринни мунтазам истеъмол қилиш айниқса қариган чоғда простата саратони хавфини камайтиришини аниқлашди. Бу ҳақда International Journal Of Cancer журналидаги мақолага асосланиб, mir24.tv хабар бермоқда.
Олимлар тадқиқот учун Осака ва Мияги префектураларида яшовчи 40 ёшдан 79 ёшгача бўлган эркакларни танлаб олишди ва уларни 1990-2008 йиллар давомида кузатишди. Эркаклардан мунтазам равишда овқатланиш рациони ва унинг таркибида қўзиқорин мавжудлиги, шунингдек жисмоний фаоллик, ёмон одатлар, сурункали касалликлар акс этган сўровномани тўлдириш сўралган.
Натижалар шуни кўрсатадики, мунтазам равишда қўзиқорин истеъмол қилган эркакларда простата саратони хавфи сезиларли камайган.
"Қўзиқоринлар витаминлар, минераллар, антиоксидантлар, айниқса L-эрготионеинга жуда бой. Айнан шу модда нотўғри овқатланиш натижасида келиб чиқадиган оксидловчи стрессни ва ҳужайралар мувозанатини, шунингдек яллиғланишни келтириб чиқарадиган атроф-муҳит токсинлари таъсирини камайтиради," – дейди Тохоку университети соғлиқни сақлаш мактаби эпидемиология кафедраси доценти Шу Чжан.
Олимлар таъкидлашича, рацион таркибидаги қўзиқоринлар миқдорининг бир оз кўпайиши келажакда инсон саломатлигига сезиларли фойда келтиради.